இலங்கை ராஜதந்திரப் பயணத்தில் புதிய மைல்கல்!

நியூசிலாந்தில் உத்தியோகபூர்வ விஜயம் மேற்கொண்டுள்ள வெளிநாட்டு அலுவல்கள், வெளிநாட்டு வேலைவாய்ப்பு மற்றும் சுற்றுலாத்துறை அமைச்சர் விஜித ஹேரத்க்கு, அந்நாட்டின் வெளிநாட்டு அலுவல்கள் மற்றும் வர்த்தக அமைச்சின் வளாகத்தில் பாரம்பரிய வரவேற்பு நிகழ்வு ஒன்று ஏற்பாடு செய்யப்பட்டிருந்தது.

தனது ‘X’ கணக்கில் பதிவொன்றை இட்டுள்ள அமைச்சர், நியூசிலாந்திற்கான உத்தியோகபூர்வ விஜயத்தின் போது இத்தகைய பாரம்பரிய வரவேற்பைப் பெற்ற முதல் இலங்கை வெளிநாட்டு அமைச்சர் தாம் என்று குறிப்பிட்டுள்ளார். 

மேலும், இவ்வாறானதொரு பாரம்பரிய வரவேற்பு நிகழ்வின் மூலம் கௌரவிக்கப்பட்டதை பெரும் பேறாகக் கருதுவதாகவும் அவர் அந்தப் பதிவில் மேலும் தெரிவித்துள்ளார்.

அவுஸ்திரேலியா மற்றும் நியூசிலாந்து நாடுகளின் அழைப்பின் பேரில், அமைச்சர் எதிர்வரும் 3 ஆம் திகதி வரை அந்நாடுகளில் சுற்றுப்பயணம் மேற்கொள்ளவுள்ளார். 

இந்த விஜயத்தின் போது, அமைச்சர் விஜித ஹேரத் நியூசிலாந்து வெளிநாட்டு அலுவல்கள் அமைச்சர் வின்ஸ்டன் பீட்டர்ஸ் மற்றும் அவுஸ்திரேலிய வெளிநாட்டு அலுவல்கள் அமைச்சர் பென்னி வோங் ஆகியோருடன் இருதரப்பு பேச்சுவார்த்தைகளை நடத்தவுள்ளார்.