இங்கிலாந்து கிரிக்கெட் சபைத் தலைவர் இலங்கைக்கு விஜயம்

இங்கிலாந்து மற்றும் வேல்ஸ் கிரிக்கெட் வாரியத்தின் (ECB) தலைவர் ரிச்சர்ட் தாம்சன் (Richard Thompson), இரண்டு வார கால உத்தியோகபூர்வ விஜயமொன்றை மேற்கொண்டு இன்று காலை இலங்கை வந்தடைந்தார்.

டுபாயிலிருந்து வருகை தந்த எமிரேட்ஸ் ஏர்லைன்ஸ் நிறுவனத்திற்குச் சொந்தமான EK-650 என்ற விமானம் மூலம் இன்று காலை 08:35 மணிக்கு வந்தடைந்தார்.

கட்டுநாயக்க, பண்டாரநாயக்க சர்வதேச விமான நிலையத்தை வந்தடைந்த அவரை, இலங்கை சுற்றுலா ஊக்குவிப்பு பணியகத்தின் (Sri Lanka Tourism Promotion Bureau) அதிகாரிகள் குழுவினர் வரவேற்றனர்.

இவரது இந்த வருகையானது இலங்கையில் தற்போது நடைபெற்று வரும் இங்கிலாந்து அணியின் மட்டுப்படுத்தப்பட்ட ஓவர்கள் கொண்ட தொடர் மற்றும் 2026 ஐசிசி ஆண்கள் இருபதுக்கு -20 உலகக்கிண்ணத் தொடர் (இந்தியா மற்றும் இலங்கையில் நடைபெறுகிறது) ஆகியவற்றுடன் ஒத்துப்போகிறது. அத்துடன், விளையாட்டின் ஊடாக இலங்கையின் சுற்றுலாவை மேம்படுத்தும் ஒரு முயற்சியாகவும் இது பார்க்கப்படுகிறது.