தமிழக சட்டசபை புதிய சபாநாயகராக ஜே.சி.டி. பிரபாகர் பொறுப்பேற்பு!

தமிழக சட்டசபையில் புதிதாக தேர்வு செய்யப்பட்ட சபாநாயகர் ஜே.சி.டி. பிரபாகரை எதிர்க்கட்சித் தலைவர் உதயநிதி ஸ்டாலின் மற்றும் அமைச்சர் செங்கோட்டையன் ஆகியோர் சபாநாயகர் இருக்கையில் அமர வைத்தனர்.

இதனைத் தொடர்ந்து, சபாநாயகர் ஜே.சி.டி. பிரபாகர் மற்றும் துணை சபாநாயகர் ரவிசங்கருக்கு சட்டமன்ற உறுப்பினர்கள் வாழ்த்துகளைத் தெரிவித்தனர்.

பின்னர் உரையாற்றிய எதிர்க்கட்சித் தலைவர் உதயநிதி ஸ்டாலின், சபாநாயகர், முதலமைச்சர் விஜய் மற்றும் தாம் ஒரே கல்லூரியில் படித்தவர்கள் எனக் குறிப்பிட்டார்.

“ஒரே கல்லூரியில் படித்திருந்தாலும், அரசை நடத்துவதில் திமுகதான் சீனியர் பேட்ஜ். 1967-ஆம் ஆண்டிலேயே ஆட்சிக்கு வந்தது திமுக. அந்த அடிப்படையில் எங்களது அறிவையும் அனுபவத்தையும் பகிர்ந்து கொள்ளத் தயாராக இருக்கிறோம். அதை ஏற்றுக்கொள்ள நீங்களும் தயாராக இருக்க வேண்டும்” என அவர் தெரிவித்தார்.

தமிழ்நாட்டின் நலனே மிக முக்கியம் என வலியுறுத்திய அவர், போட்டியின்றி தேர்வு செய்யப்பட்டுள்ள சபாநாயகரை முதலமைச்சர், எதிர்க்கட்சித் தலைவர் மற்றும் அவை முன்னவர் இணைந்து இருக்கையில் அமர வைத்திருப்பது சிறப்பான விஷயம் எனக் கூறினார்.

மேலும், “இரு தரப்பினரையும் நீங்கள் அரவணைத்து நடத்த வேண்டும். நீங்கள் கோபப்பட மாட்டீர்கள் என்று தெரியும். உங்களைக் கோபப்படுத்தும் வகையில் எங்களும் எந்த செயலிலும் ஈடுபட மாட்டோம்” எனத் தெரிவித்தார்.

சட்டமன்ற ஜனநாயகத்தில் ஆளுங்கட்சி காதுகளாகவும், எதிர்க்கட்சி குரலாகவும் இருக்க வேண்டும் என்றும், அதில்தான் அவையின் பெருமை அடங்கியுள்ளது என்றும் உதயநிதி ஸ்டாலின் குறிப்பிட்டார்.

முந்தைய சட்டசபைகளில் ஆளுங்கட்சிக்கு அதிக உறுப்பினர்கள் இருந்த நிலையில், இந்த முறை ஆளுங்கட்சிக்கு இணையான வலிமையுடன் எதிர்க்கட்சி அமைந்துள்ளதாகவும், அதுவே இந்த பேரவையின் கூடுதல் சிறப்பாகும் என்றும் தெரிவித்தார்.

மேலும், “எதிர்க்கட்சி வலிமையாக இருந்து அரசை வழிநடத்த வேண்டும். ஆக்கப்பூர்வமான விமர்சனங்களை முன்வைக்க வேண்டும் என மக்கள் நமக்குப் பொறுப்பு அளித்துள்ளனர். மக்களின் எண்ணங்களைப் பிரதிபலிக்கும் வகையில் எங்களது செயல்பாடுகள் இருக்கும்” என உதயநிதி ஸ்டாலின் தெரிவித்தார்.