மருத்துவப் பரிசோதனைக்குப் பின் மீண்டும் சிறையில் இம்ரான் கான்!

பாகிஸ்தானின் முன்னாள் பிரதமர் இம்ரான் கான், இஸ்லாமாபாத்தில் உள்ள ஷிஃபா சர்வதேச மருத்துவமனையிலிருந்து மீண்டும் அடியாலா சிறைக்கு மாற்றப்பட்டுள்ளார் என்று அவரது பாகிஸ்தான் தெஹ்ரீக்-இ-இன்சாஃப் (பிடிஐ) கட்சியின் செய்தித் தொடர்பாளர் தெரிவித்தார். 

பாகிஸ்தானிய ஊடக அறிக்கைகளின்படி, கான் மருத்துவமனையில் மருத்துவப் பரிசோதனைக்கு உட்படுத்தப்பட்டார். பின்னர், அவர் காவலில் இருப்பது பாதுகாப்பானது என மருத்துவர்கள் கருதியதால், அவர் மீண்டும் சிறைக்கு அனுப்பப்பட்டார்.

“கண் மருத்துவர், இதய மருத்துவர் மற்றும் பொது மருத்துவர் உள்ளிட்ட தகுதிவாய்ந்த மருத்துவர்கள் குழு ஒன்று அவரை விரிவாகப் பரிசோதித்து, அவர் மருத்துவ ரீதியாக நலமாக இருப்பதாக அறிவித்தது,” என்று கானின் மருத்துவப் பரிசோதனைகள் குறித்து தகவல் துறை அமைச்சர் அத்தாவுல்லா தாரார் X தளத்தில் எழுதியுள்ளார்.

“இந்த முழு செயல்முறையும் நிறைவடைந்த பிறகு, அவர் மீண்டும் அடியாலா சிறைக்கு மாற்றப்பட்டார்,” என்று அவர் மேலும் கூறினார்.

உடல்நலக் கவலைகள் காரணமாக அவருக்குச் சிறப்பு மருத்துவ சிகிச்சை அளிக்குமாறு இஸ்லாமாபாத் அதிகாரிகளுக்கு உச்ச நீதிமன்றம் உத்தரவிட்டதைத் தொடர்ந்து, 73 வயதான முன்னாள் பிரதமர் மருத்துவப் பரிசோதனைக்காக நள்ளிரவு வாக்கில் மருத்துவமனைக்கு மாற்றப்பட்டார்.

ஆதாரங்களை மேற்கோள் காட்டி, பிடிஐ நிறுவனரின் சிறைக்குச் சென்று வருவதற்கான ஏற்பாடுகள் மிகுந்த பலத்த பாதுகாப்புக்கு உட்படுத்தப்பட்டதாக ஜியோ நியூஸ் செய்தி வெளியிட்டுள்ளது. அவர் தற்போது தனது சிறை அறைக்கு மாற்றப்பட்டுள்ளார்.

அவர் மருத்துவமனையில் தங்கியிருந்த குறுகிய காலத்தில், டஜன் கணக்கான பிடிஐ ஆதரவாளர்கள் மருத்துவமனைக்கு அருகில் கூடியிருந்ததாக பிரெஞ்சு ஏஎஃப்பி செய்தி நிறுவனம் தெரிவித்துள்ளது.

முன்னாள் பிரதமர் ஏன் மருத்துவமனைக்கு அழைத்துச் செல்லப்பட்டார்?

கான் 2023 ஆகஸ்ட் முதல் சிறையில் அடைக்கப்பட்டுள்ளார். தனக்கு எதிரான வழக்குகள் அரசியல் உள்நோக்கம் கொண்டவை என்று அவர் கூறுகிறார், ஆனால் இந்தக் குற்றச்சாட்டை அரசாங்கம் மறுக்கிறது.

அவரது வழக்கறிஞர்களின் கூற்றுப்படி, சிறையில் அவரது உடல்நிலை மோசமடைந்துள்ளதுடன், அவரது வலது கண்ணில் கணிசமான பார்வை இழப்பையும் அவர் சந்தித்துள்ளார். செவ்வாயன்று பிறப்பித்த தனது உத்தரவில், உச்ச நீதிமன்றம், கானை 48 மணி நேரத்திற்குள் இஸ்லாமாபாத்தில் உள்ள ஷிஃபா சர்வதேச மருத்துவமனைக்கு மாற்றுமாறும், அவரது தனிப்பட்ட மருத்துவர் உட்பட ஒரு மருத்துவக் குழுவை அணுக அனுமதிக்குமாறும் அதிகாரிகளுக்கு அறிவுறுத்தியது.

இஸ்லாமாபாத்தில் உள்ள ஷெபாஸ் ஷெரீப் அரசாங்கம், முதலில் அந்த உத்தரவை அமல்படுத்துவதாக அறிவித்தது; ஆனால் பின்னர், தனது உத்தரவை மறுஆய்வு செய்யக் கோரியும், திரும்பப் பெறக் கோரியும் உச்ச நீதிமன்றத்தில் மனு தாக்கல் செய்தது. உடனடி சிகிச்சை தேவைப்படும் எந்தவொரு நிலையையும் மருத்துவ அறிக்கைகள் வெளிப்படுத்தவில்லை என்று அரசாங்கம் கூறியுள்ளது.

கானின் இடமாற்றத்தை எதிர்த்து, பாகிஸ்தான் சட்ட அமைச்சர் அஸாம் நசீர் தாரார், சட்டப்படி தண்டனை பெற்ற கைதிக்கு சிறைக்குள்ளேயோ அல்லது ஒரு அரசு மருத்துவமனையிலோதான் சிகிச்சை அளிக்கப்பட வேண்டும் என்று வாதிட்டார். மேலும், கானின் மருத்துவப் பரிசோதனைகளை ஒரு தனியார் மருத்துவமனைக்குப் பதிலாக அரசு மருத்துவமனையில் மேற்கொள்ளுமாறு தாம் கோரிக்கை விடுப்பதாகவும் அவர் கூறினார். 

வியாழக்கிழமை இரவு 11.59 மணிக்குள் அவர் மருத்துவமனையில் அனுமதிக்கப்படாவிட்டால், வெள்ளிக்கிழமை அன்று அரசுக்கு எதிராக நீதிமன்ற அவமதிப்பு மனு தாக்கல் செய்யப்படும் என பிடிஐ மிரட்டியதைத் தொடர்ந்து, அவர் மருத்துவமனைக்கு அழைத்துச் செல்லப்பட்டார்.

பின்னர், பாகிஸ்தானின் நாடாளுமன்ற விவகாரங்கள் அமைச்சர் தாரிக் ஃபசல் சௌத்ரி, உச்ச நீதிமன்றத்தின் தீர்ப்பை மீறவோ அல்லது அதன் அமலாக்கத்தைத் தாமதப்படுத்தவோ அரசுக்கு நோக்கம் இருக்கவில்லை என்று கூறி, அரசு அத்தீர்ப்பை முழுமையாகக் கடைப்பிடிக்கும் எனத் தெரிவித்தார்