கடந்த 2025 டிசம்பரில் இந்திய வெளியுறவு அமைச்சர் இலங்கைக்கு விஜயம் செய்தபோது, ‘டிட்வா’ சூறாவளிக்குப் பிந்தைய மீள்கட்டமைப்புக்காக 450 மில்லியன் அமெரிக்க டொலர் நிதியுதவியை அறிவித்திருந்தார். அதன் தொடர்ச்சியாக, தற்போது பேரிடர் மேலாண்மைத் துறையில் இரு நாடுகளுக்கும் இடையிலான ஒத்துழைப்பு புதிய மைல்கல்லை எட்டியுள்ளது.

பாஸ்கராசார்யா விண்வெளி பயன்பாடுகள் நிறுவனத்தின் (BISAG) பணிப்பாளர் ஜெனரல் வினய் தாகூர் தலைமையிலான குழு, மார்ச் 9 முதல் 20 வரை இலங்கையில் தங்கியிருந்து ஒரு முக்கிய புவியியல் தகவல் தளத்தை உருவாக்கியுள்ளது. இந்தியப் பிரதமர் நரேந்திர மோடியின் 'PM Gati Shakti' வடிவமைப்பின் அடிப்படையில் உருவாக்கப்பட்ட இந்தத் தளம், பேரிடர் பாதிப்புகளை முன்கூட்டியே கணிக்கவும், அரசாங்கத்தின் அனைத்துத் துறைகளும் ஒருங்கிணைந்து செயல்படவும் உதவும் ஒரு பொதுவான டிஜிட்டல் தளமாக அமையும்.

இந்தியத் தொலைத்தொடர்புத் துறையின் முன்னணி ஆராய்ச்சி நிறுவனமான C-DoT, மார்ச் 16 முதல் 20 வரை இலங்கையில் மொபைல் ஒளிபரப்பு (Mobile Broadcast) அடிப்படையிலான முன்கூட்டிய எச்சரிக்கை முறையைச் சோதனை செய்து காட்டியது. இதன் மூலம் அவசர காலங்களில் பொதுமக்களுக்கு மிக வேகமாகக் தகவல்களைக் கொண்டு சேர்க்க முடியும்.

இதே காலப்பகுதியில் விஜயம் செய்த இந்திய புவியியல் ஆய்வு நிறுவனத்தின் (GSI) நிபுணர்கள், இலங்கையின் அனர்த்த முகாமைத்துவ நிலையம் (DMC) மற்றும் தேசிய கட்டிட ஆராய்ச்சி நிறுவன (NBRI) அதிகாரிகளைச் சந்தித்துப் பேசினர். நிலச்சரிவு எச்சரிக்கை அமைப்புகளை மேம்படுத்துவது மற்றும் சிறந்த தடுப்பு நடைமுறைகளைப் பகிர்ந்து கொள்வது குறித்து இதில் விரிவாக ஆலோசிக்கப்பட்டது.

இந்தத் தொழில்நுட்பத் திட்டங்களின் செயல்முறை விளக்கம் அண்மையில் கொழும்பில் நடைபெற்றது. இதில் இலங்கைக்கான இந்திய உயர்ஸ்தானிகர் சந்தோஷ் ஜா, டிஜிட்டல் பொருளாதார பிரதி அமைச்சர் எரங்க வீரரத்ன, ஜனாதிபதியின் ஆலோசகர் ஹான்ஸ் விஜயசூரிய மற்றும் அனர்த்த முகாமைத்துவ நிலையத்தின் பணிப்பாளர் நாயகம் மேஜர் ஜெனரல் சம்பத் கொட்டுவேகொடா உள்ளிட்ட முக்கிய அதிகாரிகள் கலந்துகொண்டனர்.

இரு நாடுகளும் தொழில்நுட்பப் பரிமாற்றம் மற்றும் திறன் மேம்பாடு ஆகியவற்றின் மூலம் பேரிடர் காலங்களில் பொதுமக்களின் பாதுகாப்பை உறுதி செய்யத் தொடர்ந்து இணைந்து செயல்பட இந்தச் சந்திப்பில் உறுதியளிக்கப்பட்டது.