ஜெர்மனி மேயருடன் அமைச்சர் விஜித ஹேரத் சந்திப்பு!

ஜெர்மனிக்கு உத்தியோகபூர்வ விஜயம் மேற்கொண்டுள்ள அமைச்சர் விஜித ஹேரத், பிரேமன் (Bremen) நகர மேயர் கலாநிதி ஆண்ட்ரியாஸ் போவன்ஷுல்ட் (Dr. Andreas Bovenschulte) அவர்களைச் சந்தித்துக் கலந்துரையாடினார்.

ஜெர்மனிக்குச் சென்றிருந்த அமைச்சர் விஜித ஹேரத்தை, பிரேமன் நகர மேயர் மிகவும் உற்சாகத்துடன் வரவேற்றார். இதனைத் தொடர்ந்து இருவருக்கும் இடையில் விசேட கலந்துரையாடல் ஒன்று இடம்பெற்றது.

ஜெர்மனியின் பிரேமன் நகரம் மோட்டார் வாகன உற்பத்தி, வர்த்தகம் மற்றும் விநியோகச் சங்கிலி (Logistics) உள்ளிட்ட தொழில்துறைகளின் முக்கிய மையமாகக் கருதப்படுகிறது.

இலங்கையில் அதிகரித்து வரும் முதலீட்டு வாய்ப்புகள் குறித்து அவதானம் செலுத்துமாறு பிரேமன் நகர மேயரிடம் அமைச்சர் விஜித ஹேரத் கோரிக்கை விடுத்தார்.

ஜெர்மனியர்களிடையே இலங்கை ஒரு பிரபலமான சுற்றுலாத் தலமாக விளங்குவதால், அதனை மேலும் ஊக்குவிப்பதற்கான சூழலை உருவாக்க பிரேமன் நகர மேயர் தனது உடன்பாட்டைத் தெரிவித்துள்ளார்.

இலங்கைக்குத் தேவையான அனைத்து ஒத்துழைப்புகளையும் வழங்க ஜெர்மனி தயாராக இருப்பதாக இந்தச் சந்திப்பின் போது மேயர் உறுதிப்படத் தெரிவித்தார்.