தேசிய போக்குவரத்து ஆணைக்குழுவினால் திருத்தியமைக்கப்பட்ட புதிய பேருந்து கட்டணங்கள் எதிர்வரும் ஜூலை மாதம் 6 ஆம் திகதி திங்கட்கிழமை நள்ளிரவு முதல் அமுலுக்கு வரவுள்ளதாக அறிவிக்கப்பட்டுள்ளது. இந்த புதிய கட்டண திருத்தத்தின்படி, சாதாரண பேருந்துகளின் குறைந்தபட்ச கட்டணம் 30 ரூபாவில் இருந்து 34 ரூபா வரை அதிகரிக்கப்பட்டுள்ளது.

இதற்கமைய, சாதாரண பேருந்து சேவைகளில் 100 கிலோமீற்றர் வரையிலான பயணங்களுக்கான கட்டணம் 12 சதவீதத்தினாலும், 100 கிலோமீற்றரைத் தாண்டிய தூரப் பயணங்களுக்கான கட்டணம் 20 சதவீதத்தினாலும் அதிகரிக்கப்பட்டுள்ளது. இதேவேளை சொகுசு பேருந்து சேவைகளில் 100 கிலோமீற்றருக்கு உட்பட்ட பயணங்களுக்கான கட்டணம் 12 சதவீதத்தினாலும், 100 கிலோமீற்றருக்கு மேற்பட்ட தூரப் பயணங்களுக்கான கட்டணம் 15 சதவீதத்தினாலும் உயர்த்தப்பட்டுள்ளது. இயக்கச் செலவுகளில் ஏற்பட்டுள்ள மாற்றங்களுக்கு ஏற்ப, பயணிகள் போக்குவரத்து கட்டணங்களை திருத்தியமைப்பது குறித்து எட்டப்பட்ட உடன்பாட்டைத் தொடர்ந்தே இந்த நடவடிக்கை எடுக்கப்பட்டுள்ளதாக தேசிய போக்குவரத்து ஆணைக்குழு மேலும் தெரிவித்துள்ளது.