யோஷிதவுக்கு எதிரான வழக்கு தொடர்பில் நீதிமன்றம் பிறப்பித்துள்ள உத்தரவு

முன்னாள் ஜனாதிபதி மஹிந்த ராஜபக்ஷவின் மகன் யோஷித ராஜபக்ஷ மற்றும் அவரது பாட்டி டெய்சி ஃபாரெஸ்ட் ஆகியோருக்கு எதிராக சட்டமா அதிபர் தாக்கல் செய்த வழக்கை நவம்பர் 12ஆம் திகதி விசாரணைக்கு முந்தைய மாநாட்டிற்கு அழைக்க கொழும்பு மேல் நீதிமன்றம் இன்று உத்தரவிட்டது.

இந்த வழக்கு மேல் நீதிமன்ற நீதிபதி உதேஷ் ரணதுங்க முன் விசாரணைக்கு எடுத்துக்கொள்ளப்பட்டது.

விசாரணைகளின் போது, ​​வழக்கு தொடர்பான பல ஆவணங்களை அரசு தரப்பு பிரதிவாதியிடம் ஒப்படைக்கப்பட்டுள்ளது.

முன்வைக்கப்பட்ட உண்மைகளை பரிசீலித்த பின்னர், நவம்பர் 12ஆம் திகதி விசாரணைக்கு முந்தைய மாநாட்டிற்கு வழக்கை மீண்டும் அழைக்க நீதிபதி உத்தரவிட்டார்.

யோஷித ராஜபக்ஷ மற்றும் டெய்சி ஃபாரெஸ்ட் ஆகியோர் சுமார் 73 மில்லியன் ரூபாய் மதிப்புள்ள சொத்துக்கள் மற்றும் உடமைகளை சட்டவிரோதமாக சம்பாதித்ததாகவும், அதன் மூலம் பணமோசடி தடுப்புச் சட்டத்தின் கீழ் குற்றங்களைச் செய்ததாகவும் கூறி சட்டமா அதிபர் அவர்கள் மீது வழக்குத் தாக்கல் செய்துள்ளார்.