சீனாவின் (China) ஹூனான் மாகாணத்தில் உள்ள பிங்ஜியாங் மாவட்டத்தில் உலகின் மிகப்பெரிய தங்கச் சுரங்கம் கண்டுபிடிக்கப்பட்டுள்ளதாக வெளிநாட்டு ஊடகங்கள் செய்தி வெளியிட்டுள்ளன.

இந்திய மதிப்பில் 7.3 இலட்சம் கோடி ரூபாய் மதிப்புள்ள சுமார் 1,000 மெட்ரிக் தொன் தங்கம் நிலத்தடி பகுதியில் இருப்பதாக விஞ்ஞானிகள் அறிவித்துள்ளனர்.

இதன் மூலம், இதுவரை உலகின் மிகப்பெரிய தங்கச் சுரங்கமாக கருதப்பட்ட தென் ஆபிரிக்காவின் South Deep Gold Mine (சுமார் 900 மெட்ரிக் தொன்) சாதனையை சீனா முறியடித்துள்ளது.

இந்த தங்கச் சுரங்கம் முன்னேற்றமான 3D புவியியல் மாதிரி தொழில்நுட்பம் மூலம் கண்டறியப்பட்ட நிலையில் இந்த நவீன முறைமையின் மூலம் 2 கிலோமீற்றர் ஆழத்தில் உள்ள தங்கத் தாது அடுக்குகளை மிகத் துல்லியமாக அடையாளம் காண முடிந்ததாக குறிப்பிடப்பட்டுள்ளது.

விஞ்ஞானிகள் இதுவரை 2 கிலோமீற்றர் ஆழத்தில் 40 வகையான தங்கத் தாதுக்கள் இருப்பதை உறுதி செய்துள்ளதுடன் அதில் மட்டும் சுமார் 300 மெட்ரிக் தொன் தங்கம் இருப்பதாகக் கணிக்கப்பட்டுள்ளது.

பொதுவாக ஒரு சுரங்கத்தில் ஒரு தொன் கற்களில் 8 கிராம் தங்கம் கிடைத்தாலே மிகப் பெரிய விடயமாகக் கருதப்படும் நிலையில் பிங்ஜியாங் மாவட்டத்தின் எடுக்கப்பட்ட மாதிரி கற்களில் 138 கிராம் தங்கம் இருப்பது கண்டறியப்பட்டுள்ளதால் இது அதிக அரிதான மற்றும் பொருளாதார ரீதியாக மிகப் பெரும் மதிப்பு வாய்ந்த கண்டுபிடிப்பு என்று நிபுணர்கள் கூறுகின்றனர்.