இந்தோனேசியாவில் சமீபத்தில் கைது செய்யப்பட்டு தற்போது தடுப்புக் காவலில் வைக்கப்பட்டுள்ள நிலங்க சம்பத் சில்வா எனப்படும் பாணந்துறை நிலங்கவின் பாதுகாப்பை உறுதி செய்ய குற்றப் புலனாய்வுத் திணைக்களத்துக்கு உத்தரவிடக் கோரி தாக்கல் செய்யப்பட்ட ரிட் மனுவை 26 ஆம் திகதி விசாரிக்க மேன்முறையீட்டு நீதிமன்றம் உத்தரவிட்டுள்ளது. 

 சந்தேகநபரின் தாயார் தாக்கல் செய்த மனு, இன்று மேன்முறையீட்டு நீதிமன்றத்தின் தலைமை நீதிபதி ரோஹந்த அபேசூரிய மற்றும் பிரியந்த பெர்னாண்டோ ஆகியோர் அடங்கிய நீதிபதிகள் ஆயத்தின் முன் விசாரணைக்கு எடுத்துக்கொள்ளப்பட்டது. 

மனுதாரரின் சட்டத்தரணி மற்றும் மேலதிக சொலிசிட்டர் ஜெனரல் நரல் ஷனில் குலரத்ன ஆகியோர் முன்வைத்த வாதங்களைக் கருத்தில் கொண்ட நீதிபதிகள் ஆயம், விசாரணையை 26 ஆம் திகதி நடத்த உத்தரவிட்டது. 

 மனுவில் குற்றப் புலனாய்வுத் திணைக்களத்தின் பணிப்பாளர், காவல்துறை மாஅதிபர், சட்ட மாஅதிபர் மற்றும் பலர் பிரதிவாதிகளாகக் குறிப்பிடப்பட்டுள்ளனர். 

 குற்றப் புலனாய்வுத் திணைக்களத்தின் காவலில் உள்ள தனது மகனின் பாதுகாப்பை உறுதி செய்ய பிரதிவாதிகளுக்கு உத்தரவிடுமாறு மனுதாரர் கோரியுள்ளார். 

 மேலும், இலங்கை மனித உரிமைகள் ஆணைக்குழுவால் வெளியிடப்பட்ட வழிகாட்டுதல்களின்படி, காவலில் உள்ள சந்தேகநபர்களை எவ்வாறு கையாள்வது என்பது குறித்து பிரதிவாதிகள் செயல்பட உத்தரவிட வேண்டும் என்றும் மனுதாரர் கோரியுள்ளார்.