கண்டி ஸ்ரீ தலதா மாளிகைக்கான புதிய தியவடன நிலமேவைத் தெரிவு செய்வதற்கான தேர்தல் இன்று (7) நடைபெறவுள்ளது. 

அதன்படி, அது தொடர்பான கூட்டம் பௌத்த அலுவல்கள் ஆணையாளர் நாயகத்தின் மேற்பார்வையின் கீழ், கண்டி பௌத்த பலமண்டல மண்டபத்தில் இன்று பி.ப. 2 மணிக்கு நடைபெற உள்ளது. 

இந்த முறை இந்தப் பதவிக்காக 7 பேர் போட்டியிட உள்ளனர் என்று குறிப்பிடப்பட்டுள்ளது. 

அதன்படி, தற்போதைய பதில் தியவடன நிலமேயான பிரதீப் நிலங்க தேல, கதிர்காம மகா தேவாலயத்தின் மற்றும் பஸ்ஹம ஸ்ரீ நாத தேவாலயத்தின் பிரதான அறங்காவலரான தாமீந்த பண்டார உடுராவண, நாத தேவாலயத்தின் மற்றும் எம்பக்க ஸ்ரீ கதிர்காம தேவாலயத்தின் பிரதான அறங்காவலரான ஏ. டபிள்யூ. எஸ். பண்டாரநாயக்க ஆகியோரும் போட்டியிட உள்ளனர். 

அதுமட்டுமின்றி, பேராதனைப் பல்கலைக்கழகத்தின் வணிக நிதித் துறை மற்றும் முகாமைத்துவ பீடப் பேராசிரியரான பேராசிரியர் திலக் சுபசிங்க, அதே பல்கலைக்கழகத்தின் அறிவியல் பட்டதாரியான காமினி களுஹேண்டிவல, பதுளை சோனுத்தர ரஜமகா விகாரை மற்றும் சதரமகா தேவாலயத்தின் பிரதான அறங்காவலரும் வர்த்தகருமான ரோஷான் பிரியதர்ஷன, ஓய்வுபெற்ற இராணுவக் கேணல் நந்த மடுகல்லே ஆகியோரும் இதற்காகப் போட்டியிட உள்ளனர் என்று குறிப்பிடப்பட்டுள்ளது. 

பௌத்த அலுவல்கள் திணைக்களத்தின்படி, மகா சங்க உறுப்பினர்கள் உட்பட 263 பேர் இம்முறைத் தேர்தலில் வாக்களிக்கத் தகுதி பெற்றுள்ளனர். 

விகாரை மற்றும் தேவாலயங்கள் கட்டளைச் சட்டத்திற்கு அமைய, ஒரு தியவடன நிலமேயின் பதவிக்காலம் 10 ஆண்டுகள் ஆகும். 

அதன்படி, இன்று நியமிக்கப்படும் தியவடன நிலமேக்கு 2035 ஆம் ஆண்டு வரை சேவை செய்ய முடியும். 

கண்டி இராச்சியம் பிரித்தானிய ஆட்சியின் கீழ் வந்ததிலிருந்து, ஸ்ரீ தலதா மாளிகையின் தியவடன நிலமேயாக 19 பேர் பணியாற்றியுள்ளனர். 

தியவடன நிலமேவைத் தெரிவு செய்வது குறித்து மத்திய மாகாண பௌத்த அலுவல்கள் பிரதி ஆணையாளர் அநுருத்த பண்டார தெளிவுபடுத்தியதாவது: 

"கூட்டத்தில் ஒன்றுக்கும் மேற்பட்ட வேட்பு மனுக்கள் கிடைத்தால், அவர்களுக்கு இடையே பொருத்தமான ஒருவரைத் தெரிவு செய்வதற்காக வாக்கெடுப்பு நடத்தப்படும்." 

"சட்டத்தின்படி, 18 வயதுக்கு மேற்பட்ட 70 வயதுக்குக் குறைவான சிங்கள பௌத்த ஆணாக அவர் இருக்க வேண்டும்." 

"மேலும், அவர் நீதிமன்றத்தில் குற்றவாளியாக அறிவிக்கப்பட்டவராக இருக்கக் கூடாது," என்று அவர் கூறினார்.